প্ৰতিযোগিতা•ৰঞ্জিত শৰ্মা

জিকাৰ খেল খেলিব নোৱাৰিলো কেতিয়াও 

খেলি খেলি হাৰো

এইখন মানুহৰ খেল...

খেলি খেলি ভাগৰুৱা হৈ উঠি উঠি খেলোঁ

ৰূপৰ প্ৰতিযোগিতা

গুণৰ প্ৰতিযোগিতা

ধনৰ প্ৰতিযোগিতা

মান সন্মানৰ প্ৰতিযোগিতা

তথাপিও মইও প্ৰতিযোগী ৷ মইও মানুহ

মোৰ ভাগৰুৱা মনৰ , ভাগৰুৱা দেহৰ ,

চকুলোৰ প্ৰতিযোগিতা ৷

মোক জীপাল কৰি তোলে প্ৰকৃতিয়ে

কাহানিও প্ৰতিযোগিতা কৰিব নিদিয়ে

প্ৰকৃতি নিস্বাৰ্থ ! প্ৰকৃতি নিমাত !

প্ৰকৃতিয়ে সকলোকে সমানে চাই

সমানে পোহৰ বিলায়

সমানে উশাহ বিলায়

মই প্ৰকৃতিৰ লগত হাঁহিব বিচাৰোঁ

প্ৰকৃতিৰ বুকুত উৰিব বিচাৰোঁ

প্ৰকৃতিৰ বুকুত বিলীন হ’ব বিচাৰোঁ ৷

এদিন এদিনকৈ সকলো মানুহৰেই—

মানুহৰ দেহাবোৰ 

মানুহৰ হাড়বোৰ

মানুহৰ প্ৰতিযোগিতাবোৰ

মানুহৰ স্বাৰ্থপৰতা , অহংকাৰবোৰ

হাৰি যাব প্ৰকৃতিৰ লগত

কাৰণ, প্ৰকৃতিয়ে প্ৰতিযোগিতা নকৰে ৷

                ✍🏾ৰঞ্জিত শৰ্মা 

                      ঢকুৱাখনা,লখিমপুৰ