সৰাপাত -নিৰ্মালি কাকতি

ফাগুনৰ বলিয়া বতাহজাকে

এখিলা দুখিলাকৈ সৰা 

শুকান সৰাপাতক ক'লে 

গছৰ কোলাত তোৰ আৰু ঠাই নাই 

তথাপিও ফাগুন অহালৈ 

কিয় থাকʼ আশাৰে বাট চায়।

ফাগুন আহিল বুলিয়েই 

সৰাপাতে ঠিকনা হেৰায় 

এদিন সিহঁতেই ভৰাই তুলিছিল

 বিৰিখৰ লঠঙা গা

ডাল ভৰা সেউজীয়া পাতে

সকলোকে দিছিল ছাঁ।

এতিয়া ফাগুনৰ ধূলিয়ৰি বাটত

সৰাপাতৰ শৰাধ।

সৰাপাতৰো যে আছে ইতিহাস 

ফাগুনে লঠঙা কৰি যোৱা বিৰিখত 

নৱ পল্লৱ কোমল কুঁহিপাত 

ঋতু আহে ঋতু যায় 

ই যে প্ৰকৃতিৰ নিয়ম 

শেষ মানেই নতুনৰ আগমন

বসন্ত বুকুত সেউজীয়াৰ আলিংগন।