মহানগৰীৰ ৰাজপথত-বিনীতা মেছ

মহানগৰীৰ ৰাজপথত যেতিয়া মই খোজকাঢ়োঁ

মই যেন ধীৰপদে উভটি যাওঁ

প্ৰাগ ঐতিহাসিক সেই আৰণ্যক যুগলৈ

যিদিনা বাটে-ঘাটে চোপ লৈ থকা

অলেখ মৃত্যুৰ ফাঁকে ফাঁকে

অসহায় আদিম মানুহে বিচাৰি লৈছিল

জীয়াই থকাৰ পথ।

মৃত অজগৰৰ খণ্ডিত, গলিত দেহৰ দৰে

পৰি থাকে মহানগৰীৰ পদপথ;

চৌপাশে স্তুপীকৃত আৱৰ্জনা

দুৰ্গন্ধত বন্ধ হ'ব খোজে উশাহ-নিশাহ।

পথচাৰীৰ ভৰি তলুৱাত পিচল মৃত্যুৰ স্পৰ্শ!

ৰাতিৰ অন্ধকাৰত জাগে আসুৰিক লিপ্সা, 

বিবেক সমাজবোধ বিক্ৰী হয় 

পাচলিও লোহাৰ দামত।

নগ্ন 'মেনহোল’ৰ ফাঁকেৰে

পুৱাৰ পোহৰত প্ৰকট হয়

সুপ্ৰাচীন নগৰীৰ কদৰ্য পংকিল ছবি ,

মানুহৰ স্খলনৰ সুগভীৰ তলি

কোব খোৱা চৰাইৰ দৰে।

📌বিনীতা মেছ

ডিব্ৰুগড়