কাতি বিহুলৈ শুভেচ্ছাৰে••নাছিৰ আহমেদ

পিতাই ঐ, তই  কোৱা কথাবোৰ

এতিয়া হে ঘুনুক ঘানাক কৈ মনত পৰিছে

তই যে কৈছিলি আহিনৰ পথাৰত

             সোণগুটি ধৰে, 

আৰু কাতি বিহুত শলিতা জ্বলাবলে`

 কিন্তু,  জানা পিতাই,  আমাৰ গাঁৱত

 পৰিৱৰ্ত্তনৰ বতাহ বাৰুকৈ বলিছে ।

মোৰ সমনীয়াহঁতে ইণ্ডিয়ান আইডিয়েল, 

গাভৰুহঁতে ৰেম্পত খোজ কঢ়াত ব্যস্ত, 

হেপ্পি নিউ ইয়েৰৰ অনৰ্গল কোঢ়ালত

  মাঘবিহু হেৰাই যোৱাৰ পথত ঃ 

বিলাতী মদৰ ৰঙীন নিচাত

 বলিউড-হলিউডৰ যেন  স্বপ্ন বিলাসী

 একো একোজন নায়ক-নায়িকা!                          পিতাই ঐ,  আজি হে   ভালকৈ চালোঁ      

 আহিনৰ পথাৰ খন তেনেই উকা

ঠিক আমাৰ আইৰ কপাল খনৰ  দৰে ; 

যি এগছি-দুগছি শইচ আছে

সাত-শতৰু পোকে কুটি কুটি গিলিছে

আমাৰ পথাৰ খনো দেখোন

 অজাত ফৰিঙে বন্ধকত নিছে

 আমি কোন খন পথাৰত শলিতা জ্বলাও ? 

পিতাই ঐ,  বাপতি সাহোন 

আমাৰ  কাতি বিহু দেখোন

            আৰু বেছি কঙালী হ`ল!!